Министерот за здравство Венко Филипче на денешниот брифинг извести за состојбата со COVID-19 во нашата земја.
На Клиниката за инфективни болести се примени 5 нови пациенти, со што вкупната бројка на хоспитализирани пациенти таму изнесува 68, од кои со потешка слика се 20 пациенти, а 7 се во критична состојба на респираторна машина.
На Клиниката се примени мајка и четиримесечно бебе од Кочани со стабилна клиничка слика и тие конзилијарно се следат и се во стабилна состојба.
Кај 4 пациенти кои се лекуваат на Клиниката, се чека вториот контролен тест и ако се покаже негативен по втор пат ќе бидат пуштени дома.
Во ГОБ „8 Септември“ хоспитализирани се 25 пациенти од кои 5 се во тешка состојба на интензивна нега и се приклучени на вештачка вентилација.
Во Битола има 4 пациенти на болничко лекување, а на 1 пациент му е потребна кислородна поддршка.
Во Штип четворица пациенти се на болнички третман со лесна клиничка слика.
Во изминатото деноноќие се потврдени 46 нови случаи на COVID-19. Со ова бројката на дијагностицирани случаи во државата е 663 лица, извести министерот Венко Филипче.
Новопотврдените случаи се во градовите: Скопје –12, Куманово – 13, Прилеп – 8, Тетово -1, Струга - 2 , Велес – 8, Кочани – 1, Пробиштип – 1.
Во изминатото деноноќие направени се 341 тест. Досега во земјата се направени 6.571 тест на COVID-19.
Филипче извести дека денеска се отвараат понудите за респираторни машини, а во тек се постапките за заштитна опрема и реагенси за лабораториите.
Има еден притвореник во затворот Шутка кој починал од срцев удар. Бил примен во затворот на 8 март без сиптоми и на обдукцијата бил позитивен на коронавирусот. Во тек се епидемиолошките анкети на контактите за ова лице.
Во Домот за стари лица во Битола примен е еден штитеник на 18.03 кој подоцна бил пренесен во болница со покачена температура, а по неколку дена имал позитивен тест на коронавирус. Земени се брисеви на контактите, а Државниот инспекторат ќе ја испита постапката од примање до давање нега на пациентот.
Прес-конференцијата е во тек и Филипче одговара на новинарски прашања.
