Претседателот на СДСМ, Зоран Заев и министерот за здравство Венко Филипче, утровo го посетија пациентот Иван, на кој му беше трансплантирано срце.
Иван е во добра здравствена состојба и тој денеска заминува од Клиниката за Државна кардиохирургија на домашно лекување.
„Горд сум што испишавме историја во јавното здравство, во кардиохирургијата. Горд сум на моите колеги кои покажаа највисока стручност во својата хумана професија. Но, пред сѐ најдлабока почит за семејството на Емилија Динева за алтруизмот што го покажаа на дело. Покажавме дека знаеме и можеме. Продолжуваме максимално да се грижиме и понатаму за Иван и сите наши пациенти!“, напиша министерот Филипче на неговиот Facebook профил.
Претседателот Заев му посака добро здравје истакнувајќи дека Иван е храбар човек.
– Ви посакувам добро здравје, вие сте храбар човек и имаме златни луѓе, здравствени работници кои се грижат максимално за нашите пациенти. Вие сте нашата гордост. Имаме вредни и учени здравствени работници. Правиме сѐ да им ги подобриме условите и да ги задржиме нашите лекари во јавното здравство. Нема повредна работа од еден спасен човечки живот, рече Заев.
Осврнувајќи се на досегашните достигнувања, претседателот Заев истакна дека во изминатите три години ги подобриле условите во над 30 јавно здравствени установи и инвестиравме во набавка на нова, современа медицинска опрема.
– Ги зголемивме и платите на лекарите специјалисти, на медицинските сестри, но и на помошно-техничкиот персонал во здравството. Со тоа, го подигнавме нивото на здравствената заштита за пациентите и овозможивме подобри услови за работа за нашите здравствените работници“, истакна претседателот Заев и додаде дека во следниот мандат обезбедуваме уште повеќе инвестиции во здравството, за уште подобар здравствен систем.
Филипче истакна дека платите во здравството ќе ги зголемат за 40 отсто до 2024 година, односно по 10 отсто секоја година.
– Триесет и три милиони евра вложуваме во одделенијата за интензивна нега, за нивна модернизација и набавка на современа опрема, посочи Филипче.