Хирург од Скопје се здоби со тешки телесни повреди откако бил прегазен од малолетник кој управувал возило без дозвола. Веста ја потврди и министерот за здравство, Венко Филипче, кој објави детали за здравствената состојба на докторот.
Во билтент на МВР стои дека вчера во 20:30 часот во СВР Скопје било пријавено дека на крстосница од бул.„Мајка Тереза“ и ул.„Елисие Поповски-Марко“, патничко возило BMW X6 со скопски регистарски ознаки, управувано од 16-годишник од с.Сингелиќ, скопско, удрило во пешакот Ѓ.Ј.(58) од Скопје.
Во незгодата со тешки телесни повреди, констатирани во Комплексот клиники „Мајка Тереза“, се здобил пешакот.
Извршен бил увид на местото на незгодата од увидна екипа од СВР Скопје.
Хирургот Ѓорѓи Јота кој вчера беше прегазен од возило управувано од 16-годишник без возачка дозвола пред Клиничкиот центар во Скопје, има тешка повреда на главата, потврди денеска министерот за здравство Венко Филипче.
„Вчера во текот на ноќта ме консултираа. Колегата доктор Јота има тешка повреда на главата и се наоѓа во одделот за интензивно лекување на ТОАРИЛУЦ. Има нагмечување на мозокот и на белите дробови, поставен е на респираторна машина и сега се преземаат сите мерки на интензивно лекувањ“е, изјави Филипче во одговор на новинарско прашање пред Министерството за здравство.