Филипински рибар бил спасен во водите крај Папуа Нова Гвинеја откако 56 дена бил изгубен на отворено море, но неговиот чичко не издржал, објавија локалните медиуми.
Двајцата мажи испловиле од пристаништето Генерал Сантос, на југот од Филипините, во јануари, но бурата ги однела на отворено море каде што залутале додека еден рибарски брод не го забележал 21-годишниот Роландо Омонгос на 9 март, пишува весникот „Post Courier“.
Според весникот, кој се повикува папуанската полиција, двајцата мажи немале храна на бродот што довело до смртта на чичкото. Роландо Омонгос го држел телот на починатиот во бродот колку што можел подолго, но на крајот морал да го фрли во морето кога почнало да се распаѓа.
Момчето кое преживеало благодарение на двата петлитарски канистри со вода, било најдено ослабено и преплашено, од екипажот на бродот „Bermadethe Marie“ кој пловел од Вевак до Рабаул.
Омонгос бил прегледан од лекарите и сé уште се наоѓа на бродот во Рабаул, додека не биде организирано неговото патување до Филипините.