Филм & ТВ

Филмот со Лејди Гага беше почетокот на крајот за Бредли Купер и Ирина Шајк

11. јуни 2019 - 19:47 | А.С.

Една од најатрактивните славни двојки, холивудскиот актер Бредли Купер и руската манекенка Ирина Шајк, ја прекинаа врската после четири години поминати заедно.

Веста секако веднаш предизвика лавина од коментари и шпекулации зошто двојката што има едно дете заедно раскина наместо да заврши пред олтар.

Извори блиски до двете ѕвезди велат дека сѐ почнало кога Бредли Купер се нафатил да го снима филмот „A Star Is Born“ со Лејди Гага.

„Бредли беше многу отсутен за време на долгото снимање на филмот. Се обидоа да ја спасат врската, но едноставно не им одеше“, изјави извор близок до двојката за People.

Раскинувањето следеше по низа шпекулации дека актерот е во романтична врска со Лејди Гага која во филмот ја играше главната женска улога и партнерка на Купер.

Поради изразената хемија меѓу нив двајцата, во филмот и на јавните појавувања за промоција на филмот, но и на заедничкиот настап на Оскарите каде емотивно ја испеаја носечката песна „Shallow“, мноумина шпекулираа дека двајцата станале многу повеќе од пријатели.

Бредли Купер е познат по тоа дека го чува приватниот живот во тајност, но изненади многумина на доделувањето на наградите БАФТА кога ѝ се заблагодари на Ирина што го „трпела“ додека го снимал филмот.

„Најмногу сакам да ѝ се заблагодарам на Ирина што ме трпеше и имаше трпение за музиката што ја правев во подрум една година. Многу ти фала“, рече тогаш актерот и режисер.

Изворите исто така велат дека двојката ги поминувала изминатите месеци одвоено. Кога Ирина престојувала во семејната куќа, Бредли заминувал од градот и обратно.

Вртоглавата романса меѓу 33-годишната Русинка и 44-годишниот актер траеше четири години под будното око на медиумската јавност, а двојката заедно ја доби и ќерката Леа во март, 2018.

Шпекулациите дека „има проблеми во рајот“ почнаа да се засилуваат откако и двајцата почнаа да се појавуваат сами на официјални настани, а сега веќе не е тајна дека Ирина се спакувала и го напуштила Бредли.

Коментирај