Со филмовите „Сестри со транзистори“ и „Моби: Моби Док“ вечерва во летното кино на Кинотека на Македонија „Мирно лето“ се затвора 8-то издание на филмскиот фестивал Скопје Синема Сити. Проекциите започнуваат во 20:15 ч.
Фестивалот, кој започна со изложба на фотографии од Ник Кејв на Немања Ѓорѓевиќ и филмот „Ник Кејв: 20.000 денови на Земјата“ му оддаде почит на Кејв кој е артист во фокус за оваа година. Во рамките на програмата, беа прикажани 13 филмови меѓу кои и 4 македонски филмови на авторот Јане Алтипармаков.
Фестивалот се затвора со двата филма за електронска музика на 5 јули. „Сестри со транзистори“ ја раскажува историјата на електронската музика но преку жените композиторки чии достигнувања биле од суштинска важност за овој жанр но сепак останале на маргините и заборавени. Филмот е во нарација на Лори Андерсон.
Филмот кој следи е биографскиот филм за Моби „Моби Док“ каде на луциден начин е даден портрет на овој уметник и неговите успони и падови во една богата кариера.
Фестивалот е во организација на здружението Номад-Арт Скопје. Автор на дизајнот е на Дијана Димитриевска. Програмата на фестивалот „Скопје Синема Сити“ е поддржан од Агенцијата за филм, Министерството за култура, Кинотека на Северна Македонија, Културно Информативниот Центар, Навигаторс ПР агенција и „Спона“ центарот за култура на Србите во Македонија.