Судејќи според резултатите од експеримент во Финска, кога децата ќе минат само еден месец во игра меѓу зеленило, тоа е доволно за да им се промени имуниот систем.
Кога во една финска градинка поставиле тревник, посадиле ниска шума и им дозволиле на децата редовно да водат грижа за засадите поставени во дворот, се покажало дека разновидноста на микроорганизми во системот за варење на децата и на нивната кожа за краток период станала поздрава.
Во споредба со другите градски деца, кои вообичаено си играат во типични урбани градинки опкружени со бетон, кај децата на возраст од 3,4 или 5 години кои времето го минувале во „зелена“ градинка во Финска се покажало зголемено ниво на Т-клетките и други важни маркери на имунитетот во крвта по само 28 дена.
„Исто така забележавме дека цревната флора кај децата кои минале време во зеленило е слична кај децата од руралните средини, кои секој ден посетуваат шума“, вели Марија Рослунд, научник од Универзитетот во Хелсинки.
Нејзиниот труд е објавен минатата година. Претходните истражувања покажаа дека изложеноста на зелени простори некако е поврзано со правилното функционирање на имуниот систем кај луѓето, а уште не е утврдено дали постои причинско-последична врска меѓу тоа.
Во финскиот експеримент за првпат научниците се обидоа експлицитно да манипулираат во урбана средина во која децата минуваат време, а потоа да испитаат промени кај микроорганизмите во нивното тело.
Истражувањето споредило микроби пронајдени во дворови на 10 различни урбани градинки. Резултатите од истото се објавени во Science Advances.
