Редовното вежбање за време на бременоста е важно и за мајката и за бебето. Сепак, не треба да претерувате.
Ако вашиот лекар ви дал зелено светло, може да вежбате и така да ја намалите болката во грбот, да го контролирате зголемувањето на тежината и да го намалите ризикот од гестациски дијабетес, прееклампсија или породување со царски рез, велат експертите.
Секако, без разлика кое е вашето ниво на фитнес, важно е да намалите со интензитетот на вежбање и да го слушате сопственото тело, советуваат лекарите.
Намалете ја тежината на теговите
Истражување објавено во списанието Physical Activity and Health открива дека жените кои кревале тегови три пати неделно по половина час, помалку се соочувале со хипертензија и дијабетес, во споредба со оние кои не правеле вакви вежби.
Сепак, намалете ја тежината што нормално ја кревате, немојте да го задржувате здивот или да го кревате тегот до точка на напнување, бидејќи така создавате дополнителен притисок во пределот на стомакот.
Внимавајте на напорот
Во бременоста доаѓа до бројни промени во телото, па следењето на бројот на отчукувања на срцето не е најдобар начин да утврдите дали вежбате премногу напорно.
Ако ви треба повеќе од една минута за да го смирите дишењето или за да може нормално да разговарате, намалете го интензитетот на вежбањето.
Заборавете на стомачните вежби
Во бременоста не се фокусирајте на вежби за стомакот, бидејќи не ви се потребни. Тие може да направат поголема штета отколку корист. На бебето му треба простор да расте, а со стомачни вежби се прави притисок на тој дел од телото што веќе е изложен на стрес.
Подобро е да правите „чучњеви“ или исчекорувања во кои не го форсирате стомачниот дел, а сепак го стегнувате задникот.
Одморете од вежбите со висок интензитет
Овие вежби не се штетни за бебето, туку може да ѝ предизвикаат проблеми на идната мајка. Поради начинот на кој се изведуваат, може да предизвикаат запек или слични проблеми.
ВАЖНО: За време на бременоста не смеете да вежбате ако чувствувате болка (особено во градите), ако имате вртоглавици, главоболки, вагинално крварење или чувствувате болни контракции, слабост во мускулите или отекување на телото.