Светскиот шампион во бокс во тешка категорија во WBC верзијата, Тајсон Фјури, ја отфрли можноста за враќање во рингот. Тој изјави дека славата и богатството не можат да го поттикнат да се врати на боксот.
„Мислам дека ова, сепак, беше последната борба на „Кралот на Ромите“. Тоа ѝ го ветив и на сопругата. Ми се пружи шанса да се борам тука, на „Вембли“ и тоа му го должев на секој навивач и на секој Британец. Сега и тоа го исполнив и ова навистина е идеален момент да се спушти завесата“, изјави 33-годишниот Фјури по победата.
Но, неговата сопруга Парис подоцна изјави дека тој би можел да се врати во рингот ако е во прашање борба за обединување на титулите.
Сепак, Тајсон ја отфрли и таа можност.
„Јас завршив со боксот и тоа е вистината. Среќен сум, здрав, сè уште имам мозок и можам да зборувам. Имам убава сопруга, шест деца, шампионски титули и појаси, пари, успех и слава. Што повеќе ми треба од тоа?“, изјави Тајсон Фјури во емисијата на Пирс Морган на Fox Nation.
Во текот на кариерата, Фјури има остварено 32 победи и еден нерешен резултат.