Тренерот на Баерн, Ханс-Дитер Флик, беше воодушевен по победата над Севиља со 2:1, што им го донесе и Суперкупот на Европа на „Баварците“.
Тој рече дека понекогаш фудбалот пишува толку убави приказни како онаа на Хави Мартинес, кој го постигна победничкиот гол на натпреварот во продолженијата.
„Чави го постигна победничкиот гол. Понекогаш фудбалот пишува вакви приказни, а оваа е многу убава. Во средата имаше информација дека е пред трансфер во Атлетик Билбао, но Хави е тука, постигна гол и освои трофеј. Тој има менталитет на победник и тоа го докажа повторно против Севиља. Што се однесува до неговата иднина, ова не е најважно сега. Тој сам ќе одлучи“, изјави Флик.
Самиот Мартинес додаде: „Отсекогаш сум давал сè на теренот за Баерн, а денес не беше ништо поразлично. Дури и да играм 10 или 15 минути, секогаш се трудам да му помогнам на тимот. Денес тоа го направив со гол и сакам да славам со соиграчите“.
Тренерот на Севиља, Хулен Лопетеги, тешко го проголта поразот од минхенски Баерн од 1:2 во финалето на Суперкупот на Европа.
Тој рече дека ваквите порази секогаш болат. Сепак, стручњакот ги пофали своите играчи дека се рамноправни со најдобриот тим во Европа.
„Секогаш боли кога ќе загубиш во финале, особено кога си имал шанса да победиш. На моменти бевме притиснати, но во исто време успеавме да ги повредиме. Победничкиот гол за противникот дојде токму кога најмалку очекувавме. Трениравме само 12 дена, но сепак бевме на исто ниво со најдобриот тим во Европа и го доведовме натпреварот во продолженија. Тоа е повеќе од многу други кои се соочија со Баерн“, изјави Лопетеги.