Во новиот состав на Европската комисија ќе има и комесар за проширување, соопшти денеска во Блед претседателката на тоа тело, Урсула фон дер Лајен.
Фон дер Лајен на Бледскиот стратешки форум рече дека прашањето за проширувањето е вратено на „врвот на политичката агенда“ на последното свикување на Комисијата. Во новото свикување овој процес мора дополнително да се забрза и да добие „целосно внимание“.
Затоа, во новиот состав на Европската комисија, кој треба да биде откриен наскоро, ќе добие и комесар за проширување, најави фон дер Лајен.
Претседателката на ЕК рече дека проширувањето е „инвестиција“ во европската безбедност и економската конкурентност, па најави дека шесте земји кандидати наскоро ќе го претстават својот реформски план, кој ќе биде награден со европски инвестиции во вкупна вредност од шест милијарди евра.
