Магазинот Forbes ја објави листата на стоте најмоќни жени за 2020 година, а на неа се најдоа и најбогатите жени во светот. Германската акнцеларка Ангела Меркел, по десетти пат, е на првото место на листата.
По неа следи Кристин Лагард, шефицата на Европската централна банка. На третото место е Камала Харис, новата потпретседателка на САД, која за првпат е на листата на Forbes.
На четвртото место е претседателката на Европската комисија, Урсула фон дер Лајен, а на 18-то место е директорката на ММФ, Кристалина Георгиева.
Најмоќните жени на новата листа на Forbes доаѓаат од 30 земји, а меѓу нив има и 10 шефици на држави и 38 од деловниот свет.
На листата се и имињата на најбогатите жени, чие богатство е проценето на милијарди долари. Абигејл Џонсон, извршна директорка на финансискиот фонд Fidelity Investments, е на деветтото место на листата најмоќни жени. Нејзиното богатство се проценува на 15 милијарди долари. Покрај неа, на листата е и поранешната извршна директорка на Oracle, Сафра Кац чие богатство е проценето на 1,2 милијарди долари.
Познатата водителка Опра Винфри е на 20 место, а нејзиното богатство е проценето на 2,6 милијарди долари.
Шерил Сендберг е на 22 место кога станува збор за најмоќните жени во 2020 година, а на листата е и Мекензи Скот, поранешната сопруга на Џеф Безос. Нејзиното богатство е проценето на скоро 60 милијарди долари.
На листата најмоќни жени за 2020 година се и сопругата на милијардерот Бил Гејтс, Мелинда Гејтс, кралицата Елизабета Втора, претседателката на Претставничкиот дом на САД, Ненси Пелоси, премиерката на Нов Зеланд, Џacинда Ардерн, пејачките Ријана и Бијонсе и други.
