5 март 1993, првата авионска несреќа во Македонија

Летот 301 на Palair Macedonian Airlines со крајна дестинација Цирих се урнал веднаш по полетувањето од скопскиот аеродром.

Во авионот Fokker 100 имало 92 патника и 5 членови на екипажот од кои загинале 83, а 14 биле повредени. Пилот бил искусен 49-годишен Холанѓанец со 11.200 часови лет, додека копилотот бил 34-годишен Македонец со 5.580 часови лет кој претходно бил пилот во Jat Airways. Повеќето патници биле луѓе од Косово што работеле во Швајцарија.

Веднаш по полетувањето во 11:11 часот авионот не успеал да ја достигне потребната висина, а причината била мраз на крилата. Временските услови биле со 900 метри видливост, но паѓало снег.

Истрагата покажала дека причината за падот биле пропусти во процедурата за одмрзнување на мразот на крилата. За мраз биле проверени само почетните делови на крилата каде бил востановен снег, кој не претставувал опасност бидејќи веќе се топел. Ниту пилотите, ниту лицата задолжени за одмрзнување не знаеле дека горивото сместено во крилата било со многу ниска температура, што допринело стопениот снег да се претвори во мраз додека авионот чекал дозвола за полетување.

Фото: Aviation Accidents