Петмина повредени во трката со бикови во Памплона

Петмина тркачи беа повредени денеска за време на првата трка со бикови на годинешниот фестивал Сан Фермин во градот Памплона во северна Шпанија, но никој не претрпе повреди опасни по живот.

Тие претежно поминаа со модринки. Долгите, остри рогови на биковите не предизвикаа сериозни повреди, објави државниот радиодифузер RTVE од познатиот, но контроверзен настан. Три лица беа однесени во болница.

Фестивалот, во чест на светецот-заштитник на градот, Свети Фермин, започна во понеделникот и завршува следниот вторник. Секое утро, шест борбени бикови, некои со тежина од повеќе од 600 килограми, предводени од пар питоми волови, се водат низ тесните улици на стариот град до арената за бикови доцна попладне.

Секоја година, десетици тркачи, претежно млади мажи, се повредени додека ја тестираат својата храброст на патеката од 825 метри. Од 1924 година имало 16 смртни случаи, последниот во 2009 година.

Оваа година, како и во претходните години, групите за права на животните протестираат против традиционалниот настан, кој се одржува од 1591 година и станува сè поконтроверзен во Шпанија. Активистите за права на животните со години се спротивставуваат на трчањето со бикови, опишувајќи го како „средновековна тортура“.

И покрај ова, фестивалот продолжува да привлекува илјадници посетители од целиот свет, особено од Европа, Австралија, Азија и САД.