Фотографии од изгледнет лав во националниот парк Кругер во Јужна Африка снимени непосредно пред неговата смрт ја вознемирија јавноста.
Неговите последни мигови ги забележа Лери Ентони Панел од Калифорнија кој на неговиот блог опиша како изгледала неговата средба со лавот. Тој вели дека го здогледал токму во моментот кога лавот нашол дупка со вода во земјата.
„Додека пиеше вода се бореше да остане на нозе. Во тој момент беше кожа и коски“, раскажува Панел.
Додека се обидувало да се оддалечи, несреќното животно се тетеравело и застанувало на неколку чекори за да земе воздух.
„Тоа очигледно беа неговите последни денови“.
Некое време подоцна Лари се вратил на местото каде последен пат го видел лавот, овојпат со пријател.
„Го најдовме како лежи на тревата, исцрпен и неспособен да се движи. Бевме на метар и пол оддалеченост од него додека умираше во сенката на едно дрво. Ги спуштивме фотоапаратите и се погледнавме во очи. Сакав да знае дека нема да умре сам. Следеше неговиот последен здив. Кралот беше мртов“, раскажува тој.
„Знаев дека сум сведок на нешто многу специфично и природно.“
За разлика од другите мачки, лавовите се единствените големи мачки што живеат во семејно опкружување. Кога ќе постигнат длабока зрелост, мажјаците се истеруваат или самоволно го напуштаат чопорот, што најверојатно се случило со овој лав. Остарени и оттуѓени од семејството, лавовите не ловат и умират од глад.
