Претседателот на ФФФ упатил протестна нота до својот аргентински колега поради недоличното однесување на аргентинските фудбалери и бизарното исмевање на Килјан Мбапе, а воедно побарал и ФИФА да го казни аргентинскиот голман.
Ноел Ле Грает, кој е претседател на Француската фудбалска федерација, упатил протестна нота до претседателот на Аргентинската фудбалска асоицијација, Клаудио Тапиа, поради недоличното славје во кое предничеше голманот Емилиано Мартинес.
Мартинес после победата прво го тешеше Килјан Мбапе, за потоа во соблекувалната да побара „минута молк за Мбапе“, а на крај на славјето во Буенос Аирес да носи в рака кукла со ликот на Французинот.
Ле Грает напишал дека ваквото однесување е недозволиво бидејќи е „ненормално искажување на облик на омраза“, потенцирајќи дека „Мбапе со своето однесување после загубеното финале покажа вистински пример како секој треба да се однесува“.
ФФФ однесувањето на Еми Мартинес го пријавила и во ФИФА, но не е за очекување светската куќа на фудбалот да му наметне било каква казна со оглед на тоа што Мартинес ништо од тоа не направи на зелениот терен.
Дека Французите вршат притисок врз ФИФА потврди и министерот за финансии на оваа земја, Бруно Ле Мер, кој и јавно побара од ФИФА да преземе нешто: „Што прави ФИФА? Спортот значи ферплеј. Значи покажување почит кон другите. Значи покажување почит кон оние што загубиле“.
