Уличен карневал во Марсеј, кој привлече бројни посетители, на крајот заврши со солзавец и казни за учесниците откако се замеша француската полиција.
Голема толпа народ, поголемиот дел млади лица и без заштитни маски, парадираа пеејќи и танцувајќи низ улиците на пристанишниот град во медитеранскиот дел на Франција.
На еден плоштад запалија и оган, па маскирани парадираа и пееја околу него.
Се работи за карневалот Ла Плен кој се организира секоја година и кој лани беше откажан поради пандемијата. Но, годинава властите немаа дадено дозвола за одржување на негиовото 21 издание, туку беше самоиницијативно.
Полицијата мораше да употреби солзавец за да ја растера големата маса народ. Засега нема информации за уапсени лица, а потврдено е дека бројни учесници на настанот добиле казни од по 135 евра поради кршење на мерките за превенција од ширење на коронавирусот, односно не држење социјална дистанца и неносење заштитна маска.
Повеќе региони во Франција, вклучително и престолнината Париз, неодамна беа ставени под четиринеделен локдаун поради третиот бран на инфекција. Со нив не беше зафатен и Марсеј.
„Ни одобрение од префектурата, ни маски, ни физичка дистанца. Тотална неодговорност на учесниците во Ла Плен карневалот во Марсеј среде здравствена криза“, објави полицијата задолжена на регионот во и околу градот.