Францускиот фудбал е пред колапс: Клуб од ЛШ и уште 7 прволигаши се пред банкрот

На францускиот фудбал му се заканува целосен колапс, бидејќи Француската фудбалска федерација (ФФФ) сѐ уште нема добиено понуда за ТВ преносите од сезоната што наскоро треба да започне, па дури 8 прволигаши се во опасност од банкрот.

Францускиот фудбал доживува катастрофа каква што досега не е видена во ниту една од „петте лиги“. Имено, веќе со месеци нема понуда за ТВ преноси во петгодишниот циклус од 2025 до 2029 година, што воедно значи дека клубовите не ја добиле финансиската инјекција која им е потребна.

Претходно, првиот човек на ФФФ, Венсан Лабирн, бараше повеќе од една милијарда евра по сезона за ТВ преноси, но заминувањето на ѕвездите како Лионел Меси, Нејмар и сега Килјан Мбапе значеше дека никој не сака да ги плати тие пари.

DAZN и beIN Sports беа спомнати како потенцијални купувачи за ТВ правата, но никогаш не беше постигнат договор. Цената на правата е преполовена, но понуда сѐ уште нема.

Најпочитуваниот француски весник L'Équipe сега излезе во јавноста и најави потенцијален пад. Дури 8 клубови од елитното друштво се пред банкрот доколку не се подобри состојбата.

Тоа се Оксер, Ланс, Нант, Рамс, Монпелје, Брест, Ле Авр и Анже. Сите тие се во ризик од банкрот поради немање финансиски средства, сѐ затоа што ТВ правата сѐ уште не се продадени.

Како што видовте, на списокот е и екипата на Брест, која треба да учествува во групната фаза од Лигата на шампионите бидејќи минатата сезона направи сензација со освојувањето на 3. место. На списокот е и Ланс, кој минатата сезона играше во Лигата на шампионите, како и Монпелје кој не така одамна беше шампион на Франција.

Да потсетиме, француската Лиг 1 имаше многу проблеми и контроверзии при последниот договор за ТВ правата, па поради правни недоразбирања и финансиски проблеми во 2020 година беше раскинат договорот со шпанската телевизија Mediapro.