Францускиот ресторан Mirazur во Ментон е прогласен за најдобар во светот според изборот на специјализираното списание Restaurant. За првпат готвачот Мауро Колагреко се наоѓа на врвот на престижната листа. Претходно ресторанот беше на третото место.
Исто така, за првпат Франција е на првото место откако почна наградувањето пред 18 години.
На второ место е ресторанот Noma во Копенхаген.
Ресторанот Mirazur и аргентинскиот готвач Колагреко се вистинска инспирација за регионот, со служењето зеленчук кој тој лично го одгледува во градината како и со други локални продукти од медитеранско потекло.
Менито за ручек чини 160 евра, додека целосното дневно мени е 260 евра, пишува Time. Во друштво на сопругата Јулија, која е Бразилка, како и со вработените во ресторанот, Колагреко по прогласувањето за победник се качи на бината носејќи големо знаме на кое беа четири помали знамиња – аргентинско, бразилско, француско и италијанско.
„Ова знаме го прикажува Mirazur и новиот начин на готвење во Франција“, изјави тој.
Тој ѝ оддаде признание на Франција која му овозможила да се изрази кон гастрономијата, на Аргентина за спомените од детството, на Бразил за љубовта на неговиот живот и на Италија, земја од која потекнуваат половина од неговите вработени во тимот.