Еден од најгледаните ситкоми на сите времиња се враќа на малите екрани по 19 години пауза. Истоимениот спиноф „Frasier“ веќе влезе во продукција.
„Добра ноќ Сиетл. Здраво Бостон!“, објави студиото Paramount+ потврдувајќи дека љубителите на омилениот психијатар Фрејжр Крејн повторно ќе можат да уживаат во комичните авантури на овој незаборавен лик.
И самиот ситком „Frasier“ беше спиноф на друг постар ситком, познатиот „Cheers“, кој се емитуваше од 1982 до 1993 на NBC. Ликот Фрејжр Крејн во него беше споредна улога, за потоа да стане главен лик во ситкомот посветен токму на неговиот живот.
Новата серија повторно се врти околу овој лик, а камбек во неговата улога прави актерот Келси Грамер, кој овој лик го игра уште од неговото прво појавување во епизодата „Rebound (Part 1)“ во 3. сезона на „Cheers“. Грамер сега има 67 години. Дејството на серијата ќе се одвива во Бостон, градот каде што се одвиваа и авантурите од „Cheers“.
Засега не е потврдено дали некои ликови од оригиналната екипа на „Frasier“ ќе се појават во новиот ситком, како братот на Фрејжр, необичниот сноб Најлс Крејн. Со оглед на тоа што актерот Џон Махони почина во 2018 година, јасно е дека нивниот татко Марти Крејн нема да се појави. Улогата на Махони стана толку легендарна што би било дегутантно друг актер да ја игра. Претходно кога пред две години беше најавен спинофот во јавност излегоа информации дека Дејвид Хајд Пирс (Најлс Крејн), Џејн Лифс (Дафни Мун) и Пери Гилпин (Роз Дојл) не би заинтересирани за камбек.
Потврдено е дека серијата ќе добие нови ликови. Во улогата на Алан Корвол, стар колеџ другар на Фрејжр, ќе се појави маестралниот Николас Линдхрст, познат по улогата на Родни Тротер од британската „Only Fools and Horses“.
Екипата ќе добие и свежа крв бидејќи тука е синот на Фрејжр, Фредерик Крејн, но улогата нема да ја репризира Тревор Ајнхорн кој порасна со улогата, туку британскиот актер Џек Катмор-Скот.
Внукот на Фрејжр, односно синот на Најлс и Дафни, Дејвид, го толкува Андерс Кит, додека Џес Салгеиро ја игра Ив, цимерка на Фреди.
Како еден од главните ликови е наведена и Оливија, чија улога ја игра нигериската актерка Токс Олагундоје, позната по улогите на Хејли Шиптон од „Castle“ и Џеки од „The Neighbors“. Оливија ја води катедрата по психологија на Ајви Лиг, атлетска конференција составена од спортските тимови на осум приватни високо-образовни институции од Североисточна Америка.
Снимањето почна на 1 февруари, а се знае и дека првата епизода ќе се вика „The Good Father“, што ја поврзува со пилот-епизодата од оригиналната серија („The Good Son“).
