Македонската младинска фудбалска репрезентација воопшто немаше среќа во денешната жрепка за квалификациите за пласман на Европското првенство 2023.
Фортуната ни малку не беше наклонета кон младите Македонци сместувајќи ги во квалификациската група Х заедно со Франција, Србија, Украина, Фарски Острови и Ерменија.
Франција е докажан гигант кога станува збор за младинскиот фудбал, а со нив последен пат бевме во квалификациите за У21 ЕУРО 2017 кога двапати одигравме нерешно и на крајот завршивме први во групата изборувајќи се за историскиот пласман на завршницата. Тој циклус игравме и со Украина, тогаш ги надигравме, но сега имаат подобра генерација.
Србија често ни паѓа, а со нив имаме негативен скор. Бевме во иста група дури и на самото ЕУРО 2017 кога одигравме 2:2.
Фарските Острови беа во нашата група и на последните квалификации, а Ерменците ни паднаа од последниот барабан, како за беља, од каде од сите останати репрезентации беа далеку послаби.
Квалификациите ќе почнат веќе во март, а наскоро ќе биде познат и распоредот на натпревари. Победниците од деветте групи, како и најдобрата второпласирана репрезентација, ќе обезбедат директен пласман на Европското првество кое во 2023 година ќе се одржи во Грузија и Романија, а останатите 8 второпласирани ќе играат бараж за да се добијат останатите 4 квалификанти.
