Македонската фудбалска репрезентација со пораз ги заврши настапите во овогодинешното издание на Лигата на нации каде не успеа да се пласира ранг погоре и наредната сезона останува во третиот ешалон.
Репрезентацијата на Ерменија е патникот во Лига Б од групата во која се наоѓаа уште Македонија, Грузија и Естонија. Со две победи во последните две кола Ерменците од третото место го зграпчија врвот на табелата и се изборија за пласман меѓу подобрата половина на фудбалска Европа.
Македонија испушти огромна шанса да се најде на тоа место. Пред одигрувањето на последното коло бевме први во нашата група, но на последниот натпревар го направивме токму она кое не ни одговараше - загубивме. Од историскиот пласман на ЕУРО, за кратко време стигна враќање во реалноста.
Јасно беше дека ќе биде тешко бидејќи селекторот Ангеловски настапи со речиси резервниот состав откако поради суспензии и повреди не беа во комбинација Алиоски, Николов, Адеми, Димитриевски, Елмас, Барди, додека Пандев доби заслужен одмор.
Во првиот дел македонските фудбалети најчесто се закануваа од далечина преку Трајковски кој упати неколку удари, но или голманот Јурченко одлично бранеше, или топката завршуваше вон рамките на голот.
Единствениот гол кој го реши победникот го постигна поранешниот играч на Вардар, латералниот бек Ховханес Ханбарѕумјан кога во 55. минута му избега на Стојановски и со незгоден удар го совлада Шишковски измамувајќи ги и Зајков и Муслиу.
Во другиот натпревар од нашата група, кој се играше истовремено, Грузија и Естонија одиграа без голови.
Конечна табела:
- Ерменија 11
- Македонија 9
- Грузија 7
- Естонија 3
Ерменија наредната сезона ќе игра во Лига Б, Македонија и Грузија остануваат во Лига Ц, додека Естонија ќе игра бараж за избегнување испаѓање во Лига Д.