Шпанската фудбалерка Паула Дапена (24) одби да учествува во едноминутно молчење поради смртта на Диего Марадона и сега добива закани по живот.
Фудбалерката на шпанскиот клуб Виахес Интериаса пред пријателскиот натпревар против Депортиво ла Коруња седна на тревникот свртена во спротивна насока од другите, додека сите останати фудбалерки, тренери и судии стоеја во тишина.
„Нема да стојам проостум за еден насилник, педофил и силувач, туку ќе седнам и ќе го свртам грбот“, ја цитираа шпанските медиуми.
„За да може некој да се смета за одличен играч, тој мора да биде пред сè и маж и да има доблести кои се поважни од вештините со топка, а за кои се знае дека кај Марадона беа просто спектакуларни“, вели младата фудбалерка.
Дапена рече дека добила голема поддршка за нејзиниот потег, но исто така и закани по живот. Заплашувања и закани стигнале и до нејзините колешки. Но, таа истакна дека никогаш не зажалила за стореното и дека би го направила истото повторно.
„Моите феминистички идеали не можат да го дозволат тоа – да му оддадам чест на Марадона. Тој беше неверојатен играч за мене, но како личност беше далеку од некој кој треба да биде обожаван“, изјави таа за радиоемисијата A Diario.
Марадона се соочи со обвиненија за семејно насилство откако во 2014 година беше објавено видео на кое тој се расправа со тогашната девојка и се чини дека ќе ја удри.
Тој ги негираше обвинувањата, велејќи: „Го грабнав телефонот, но се колнам во Бога дека никогаш не сум удрил жена“.
Никогаш не беше поднесено обвинение против него за овој случај.
Марадона, кој важи за еден од најдобрите фудбалери на сите времиња, почина минатата среда, истиот ден кога се одбележува Меѓународниот ден за борба против насилството врз жените.
