Пласманот на континентално првенство не значи и автоматски напредок на ранг-листата на ФИФА каде Македонија годинава ја завршува на 65-тото место.
Откако се одигра и последниот меѓудржавен фудбалски натпревар на планетава, ФИФА ја објави и декемвриската ранг-листа на која промени речиси и да нема бидејќи вкупно се одиграа само два натпревара. Всушност, се одигра само еден, оној во азиските квалификации помеѓу Катар и Бангладеш, а вториот е неодигран туку е доделена службена на победа на Швајцарија отакако поради позитивни фудбалери Украина не го одигра натпреварот во Лигата на нации на средината од минатиот месец.
Македонската репрезентација не беше активна, ниту пак оние рангирани околу неа, па така остана непроменето бодовното салдо, како и она 65. место на кое бевме и минатиот месец.
Наредната ранг-листа ФИФА ќе ја објави на 18 февруари 2021 година. Македонија има натпревар тек на 25 март кога ќе почнат квалификациите за пласман на Мундијалот 2022 кога играме на гости со Романија.
