Златните мундијалски генерации на Бугарија и Турција ќе одиграат ревијален натпревар со Христо Стоичков, Красимир Бал'ков, Јордан Лечков од една и Хакан Шукур, Јилдирај Баштурк, Хасас Шаш од друга страна.
Бугарија и Турција заеднички ќе се потсетат на нивните златни фудбалски времиња. Особено значајно за Бугарите бидејќи нивната репрезентација одамна воопшто не наликува на онаа на Стоичков.
Натпреварот е закажан за 26 септември и ќе се игра на „Арда“ стадионот во Крџали, град во јужна Бугарија каде има најголем дел на турско малцинство. Билетите чинат по 3, 5 и 7 лева.
Бугарите на Мундијалот во САД 1994 направија неверојатен подвиг играјќи во полуфиналето каде Роберто Баџо им го сруши сонот за финале. Претходно го елиминираа бранителот Германија со 2:1, го исфрлија и Мексико на Луис Гарсија и Хорхе Кампос, а во групата ја совладаа и Аргентина.
За Бугарија тогаш на голот беше Борислав Михајлов, во одбраната Трифон Иванов, Цанко Цветанов, Петр Хунчев и Илијан Кирјаков, во средниот ред беа Златко Јанков, Наско Сираков, Красимир Бал'ков и Јордан Лечков, а во нападот Емил Костадинов и Христо Стоичков. Тимот го водеше Димитр Пенев.
Турција имаше слична авантура на Мундијалот 2002 во Јужна Кореја и Јапонија каде стигна до бронзата. Заврши втора во групата со Бразил, Костарика и Кина, потоа ги елиминираше ко-домаќинот Јапонија и изненадувањето Сенегал, а во полуфиналето повторно налета на Бразил. За третото место го совладаа и другиот ко-домаќин, Јужна Кореја.
Турската златна генерација ја водеше Шенол Ѓунеш. На голот беше легендарниот Рушту Речбер, во одбраната Фатих Акјел, Алпај Озалан, Булент Коркмаз и Ерѓун Пенбе, во средината Тугај Керимолу, Умит Давала, Јилдирај Баштурк и Емре Белозолу, а во нападот Хасас Шаш и Хакан Шукур. Од клупата секогаш влегуваше младиот напаѓач Илхан Мансз.