Веднаш откако синоќа пристигна тажната вест за смртта на Пеле, целиот фудбалски свет пламна со последни пораки за човекот што го нарекуваа едноставно Кралот.
Бразил прогласи тридневна жалост поради смртта на фудбалската легенда Пеле, јави денеска порталот G1, повикувајќи се на декрет потпишан од бразилскиот претседател во заминување Жаир Болсонаро.
Погребната церемонија ќе почне в понеделник, на 2 јануари во 10 часот по локално време на стадионот на Сантус во Саун Пауло, каде почна кариерата на Пеле во 1956 година, јавуваат бразилските медиуми.
Телото на Едсон Арантес до Насименто Пеле ќе биде изложено 36 часа на теренот каде ќе може да му се одаде последна почит на трикратниот светски првак со репрезентацијата на Бразил.
Погребот ќе се одржи на 3 јануари, по негова желба на гробиштата Меморијал Некропола Екуменика, каде се погребани и неговите роднини и пријатели. Погребот ќе биде затворен за јавноста и на него ќе присуствуваат само членови на потесното семејство и блиски пријатели.
