Фустанот што Ејми Вајнхаус го носеше на нејзиниот последен настап, беше продаден на аукција за 243.200 долари – 16 пати повеќе од првично проценетата вредност.
Повеќекратната добитничка на Греми награда го носеше зелено-црниот фустан со бамбусови мотиви, на нејзиниот концерт во Белград во јуни 2011 година. Еден месец подоцна, на 23 јули, таа почина од труење со алкохол, на само 27 години. Нејзината смрт беше кулминација на долгата (и, прилично јавна) борба против алкохолот и дрогата.
Amy Winehouse's last concert dress sells for $243,200 https://t.co/OU9S70a6Aa pic.twitter.com/Gqz1sa23oB
— Zyite.news (@ZyiteGadgets) November 8, 2021
Фустанот беше еден од највредните предмети на ѕвездата, продадени од родителите на Вајнхаус, Мич и Џенис, во Калифорнија. Целата колекција заработи вкупно 4 милиони долари – двојно повеќе од првичната процена на аукциската куќа Julien’s.
„Се разбира, има обожаватели, музеи и колекционери ширум светот кои ќе сакаат да поседуваат некои од овие предмети, да се грижат за нив, да ги изложуваат, да го одржуваат нејзиното наследство и паметење живо и, во истовреме, да соберат пари за фондацијата именувана по неа“, изјави Мартин Нолан од аукциската куќа.
Приходите ќе бидат наменети за Фондацијата „Ејми Вајнхаус“, која им помага на ранливи млади луѓе кои се борат со зависност.
