Македонската репрезентација во футсал со минимални 1:0 го совлада Велс и со победа стартуваше во претквалификациите за пласман на ЕУРО.
Победничкиот гол беше дело на Даниел де Соуза во 23. минута. Македонија доминираше во текот на целиот натпревар, но и покрај 47-те удари кон противничкиот гол само еднаш го најде патот до велшката мрежа.
Македонија натпреварот го почна со Петковски на голот, во поле играа Крстевски, Леовски, Зибери и Андов, додека од клупата почнаа Петровски (гк), капитенот Левески, Исмаили, Де Соуза, Агуши, Ранготов, Рамадан, Арсовски и Сефери.
Претквалификацискиот турнир е во организација на ФФМ и натпреварите се играат во салата „Јане Сандански“ во Аеродром. Денеска од 19 часот се среќаат Норвешка и Велс, а во последното коло в сабота во истиот термин Македонија и Норвешка веројатно ќе решаваат за првото место.
Првопласираната репрезентација ќе обезбеди место во квалификациите, додека второпласираната ќе игра бараж.
