По доделувањето на годинешните Оскари, еден од најзборуваните моменти на свеченоста беше настапот на Лејди Гага и Бредли Купер со песната „Shallow“ од нивниот филм „A Star is Born“ за која Гага доби Оскар за најдобра оригинална песна.
Со денови се зборува за тоа дека настапот на двете ѕвезди беше емотивен и сензуален, па не изостанаа и шпекулациите дека филмските љубовници се тајно заљубени и во вистинскиот живот.
Тоа беше секако и една од темите за разговор во Шоуто на Џими Кимел каде Гага синоќа беше гостинка.
„Најпрво би сакала да кажам дека социјалните мрежи се веце шолјата на интернетот“, почна Лејди Гага, која во студиото со себе ја донесе и златната статуетка.
„Го видовте она што ние сакавме да го видите. Тоа е љубовна песна. Филмот е љубовна приказна и ние напорно работевме на тоа“, објасни Гага.
Таа додаде дека Купер имал точна визија како сакал сето тоа да изгледа.
„Го прегрнував и Тони Бенет во изминативе три години додека настапувавме заедно. Тоа се прави кога пееш љубовна песна“, тврди Гага.