Израелската актерка Гал Гадот ја игра главната улога во блокбастерот Wonder Woman, но и во вистинскиот живот таа е вистинско Чудо од жена.
32-годишната Гадот е мајка на две деца, била Мис на Израел, студирала право, работела во Армијата како инструкторка за боречки вештини, а додека го снимаше филмот Wonder Woman беше во петтиот месец од бременоста.
„Непроспиена ноќ, бебето имаше грчеви во стомакот, а петгодишната ќерка рано ме разбуди. Излегов да испијам кафе во двор за да се разбудам и да земам малку свеж воздух. Сега гледам цртан The cat in the hat со ќерка ми. Секогаш ме одушевувало како токму наједноставните работи нѐ прават најсреќни. Ме фотографираше моата друга ненаспана половина“, напиша Гадот под фотографијата што вчера ја објави на Instagram.
Покрај тримесечната Маја со Јарон Версан, 32-годишен трговец со недвижнини, ја има и петгодишната ќерка Алма. Заедно со семејството таа живее во Тел Авив.
Хиперактивната актерка е навистина сестрана.
Во средно училиште играла кошарка и вежбала боречки вештини. Мислела дека ќе студира биологија, што било желба и на нејзините родители, но наместо тоа, таа на 18 години се пријавила на Изборот за Мис на Израел. Откако победила, работела како модел за Miss Sixty, Huawei, Gucci, Cosmopolitan...
По модната приказна, Гадот отишла во војска каде била инструкторка по боречки вештини. Тренирала мечување, кунг фу, кик-бокс, џиу-џицу и капоеира.
Потоа се запишала на факултет и студирала право и меѓународни односи, но на крај победила љубовта кон актерството.
Пред само седум години израелската убавица почнала да оди на часови по глума, а денес е ѕвезда на светски блокбастер.
Гадот во слободно време вози мотори, а на многумина сигурно им е веќе позната од улогата во филмот The Fast and the Furious.
Завршните акциони сцени од Wonder Woman ги снимаше во петтиот месец од бременоста.
