Актерката Гал Гадот, која му се претстави на светот со нејзината улога како суперхероината Wonder Woman во истоимениот филм, се закани дека нема да глуми во вториот дел од оваа франшиза ако студиото Warner Bros. не го отпушти режисерот Брет Ратнер.
Гал Гадот бара да биде отпуштен режисерот Брет Ратнер поради тоа што тој неколкупати беше обвинет дека сексуално вознемирувал актерки кои работеле на неговите филмови, а последна го обвини Оливија Мун, која рече дека ова е чест случај на неговите сетови.
Откако беше обвинет од повеќе жени, Брет Ратнер реши дека самиот ќе се повлече од режисерските должности поврзани со Warner Bros. за да не му прави проблем на студиото, но Гал Гадот бара студиото да ја прекине секоја соработка со него.
Warner Bros. и Ратнер се долгогодишни партнери, а компанијата на Ратнер, RatPac Entertainment финансираше многу филмски хитови на WB, меѓу кои и „Gravity“ и „It“.
Во моментов Холивуд го „тресат“ скандали со сексуално вознемирување, силување и педофилија, за кои се обвинети некои од најславните личности од САД. Брет Ратнер е уште еден од низата на обвинетите и би било разбирливо доколку Warner Bros. решат да ја прекинат меѓусебната соработка.
Гал Гадот беше дел од „Wonder Woman“, филм кој му донесе огромни пари на студиото, па тешко е да се верува дека WB би можеле да ја жртвуваат Гадот и да застанат на страната на Ратнер во овој случај.
