Тренерот на Пари Сен-Жермен, Кристоф Галтје, ги критикуваше навивачите на парискиот клуб кои го исвиркаа Аргентинецот пред, за време и по дуелот со Лион во 29. коло од француската лига.
Синоќа ПСЖ на домашен терен беше поразен од Лион со 1:0, а навивачите на актуелниот шампион на Франција го исвиркаа секој потег на Меси на овој натпревар.
Француските медиуми тврдат дека навивачите на ПСЖ се лути на аргентинскиот фудбалер, кој сѐ уште не го продолжил договорот со клубот од Париз, а Меси е посочен како главен виновник за елиминацијата од осминафиналето на Лигата на шампионите.
„Не разбирам зошто Меси е мета на критики. Чекаме тој или Килјан Мбапе да ја решат ситуацијата. Тој ја води нашата игра, многу се труди... Сепак, не смееме да очекуваме двајцата сами да ја завршат работата. Свирежите немаат смисла, бидејќи Меси даде многу во првиот дел од сезоната. Постигнуваше голови и асистираше. И на другите е да му помогнат на тимот“, истакна Галтје.
ПСЖ е прв на табелата во француската Лиг 1 со 66 бодови, додека второто место го делат Ланс и Марсеј со по 60.