Тренерот на Лион вели дека тактиката била клучот за вчерашниот голем триумф над фаворитот Манчестер Сити.
„Горд сум на моите борци, на моите играчи. Верувавме во себе, дека можеме да приредиме вакво нешто. Примивме само еден гола и тоа е поради тимскиот дух на групата“, почна предводникот на Лион во интервју за RMC Sport по натпреварот.
Два гола синоќа постигна Муса Дембеле, кој претходно сезонава во 8 натпревари од Лигата на шампионите немаше постигнато ниту еден гол, а поради прекинот на сезоната во Франција последниот гол му беше дури на 1 март против Сент-Етјен.
„Муса беше разочаран, но како што кажав и пред натпреварот, знаев дека тој ќе биде главен веднаш штом ќе се врати. Презадоволен сум што даде два гола бидејќи сѐ уште немаше гол во натпреварувањето“.
Руди Гарсија седна на столчето кај Лион во октомври лани. Претходно ги предводеше Марсеј, Рима, Лил, Ле Ман, Дижон и Сент-Етјен.
„Со Пеп едноставно мора да очекуваш било што. Знаевме дека е способен да зготви нешто за да нѐ дестабилизира, но сега може да речеме дека ја добивме тактичката битка. По Лајпциг, наша цел беше да се најдеме во осминафиналето и тоа и го остваривме. Доколку продолжиме со истиот пристап, можеме да изненадиме и со Баерн“, вели францускиот стратег.
Лион беше во истата група со Лајпциг, а сега овие два тима се изненадување и двата се во полуфиналето.
