Шпанската кошаркарска легенда, Пау Гасол се надева дека ќе игра уште една сезона пред да се повлече. 39-годишниот центар веќе посочи дека би сакал да ја заврши кариерата во родниот град Барселона, но не ја исклучува можноста да го стори тоа во тимот со кој освои две титули во НБА – Лос Анџелес Лејкерс.
– Дали размислувам сериозно? Не би рекол дека имам многу опции. Тоа е нешто што ми падна на памет. Да се заврши мојата кариера во Лејкерс би било одлично. Можноста е привлечна, но засега тоа не е потврдено официјално, објаснува легендарниот кошаркар.
Гасол се приклучи на Лејкерс во 2008 година и беше заслужен за освојувањето на титулите во 2009 и 2010 година.
– Имам одлична врска со Лејкерс и градот Лос Анџелес. Тоа секогаш ќе биде важно за мене, без оглед на тоа што ќе се случи. Ќе видиме, рече Гасол.
Во својата НБА кариера има одиграно 1.226 натпревари, со просек од 17,0 поени, 9,2 скокови и 1,6 блокада, а ги носел дресовите на Мемфис, Лејкерс, Чикаго и Сан Антонио во поголемиот дел од својата кариера.