Помеѓу Гасперини и Лукман летаа искри кога Аталанта беше елиминирана од Клуб Бриж во Лигата на шампионите, а тренерот на „Деа“ прстот на вината го впери кон Нигериецот, кој промаши пенал и го спречи неговиот тим да го постигне посакуваниот резултат.
Сепак, се чини дека страстите се смирија, односно дека двајцата ги закопаа секирите, особено по триумфот против Јувентус. Крилниот напаѓач успеа да постигне гол и покажа дека голем дел од играта на Аталанта сѐ уште се врти околу него.
Џан Пјеро Гасперини не се двоумеше да го пофали Адемола Лукман, а истакна дека до крајот на сезоната би можел дури и да ја носи капитенската лента.
„Кога поминувате 300 дена годишно заедно, може да има разлики во мислењата. Лукман е фантастичен играч, но стана исклучителен само кога почна да го гледа тимот од друга перспектива. Порано беше повеќе индивидуалец. Не беше лошо момче, но беше доста себичен. Кога го коригираше својот пристап, Аталанта порасна поради него. Сигурен сум дека може да стане капитен на тимот до крајот на сезоната“, изјави Гасперини.
Лукман сезонава постигна 18 голови на 31 натпревар во сите натпреварувања, како и 7 асистенции. Есента се закити и со престижната награда Африкански фудбалер за 2024 година.
