Аталанта вечерва продолжува со испишувањето историја, игра осминафинале во дебитанстката сезона во Лигата на шампионите, а на гости им доаѓа Валенсија.
Тренерот Гасперини нема никакви проблеми со повредени или суспендирани играчи. Го има целиот тим на располагање.
„Лигата на шампионите е емотивна, мораме да бидеме во нашето најдобро издание. Сите коцки се наредени за да одиграме одличен натпревар. Добро е да се биде позитивен, но сепак, мораме да избегнеме летање во облаци со еуфорија“, вели стратегот Џан Пјеро Гасперини.
Факт е дека по жрепката навивачите на Аталанта ги зафати еуфорија бидејќи за противник ја добија Валенсија, веројатно најпосакуваниот противник од првиот барабан. „Лилјаците“ доаѓаат во Италија со серија од три натпревари без победа: пораз и реми во Ла Лига и пораз зачинет со елиминација во Копа дел Реј. Валенсија ја мачат и повреди, а суспендиран е дефанзивецот Габриел.
„Валенсија ги победи Ајакс и Челси на гости, тие знаат да бидат опасни. Валенсија има квалитет, но ние треба да се сконцентрираме на нашата игра. Сите се на број и едвај чекаме да играме“, најавува Гасперини.
Колумбискиот напаѓач Дуван Запата после Нова година се врати од повредата, но Гасперини најваи дека нема да стартува. Во нападот веројатно ќе бидат Јосип Иличиќ, Папу Гомес и Марио Пашалиќ.
„Запата веројатно нема да почне вечерва. Тој може да ни донесе многу квалитет со влегувањето од клупата“.
Околу 40 илјади навивачи на Аталанта вечерва ќе се појават на „Џузепе Меаца“. Блискоста на Бергамо со Милано е во прилог на популарната „Деа“ и нејзините навивачи. За потсетување, Аталанта во Лигата на шампиони игра на стадионот во Милано бидејќи нејзиниот „Атлети Аѕури д'Италија“ во Бергамо не ги задоволува критериумите на УЕФА.
Натпреварот е со почетокот во 21 часот, а ќе го суди Англичанецот Мајкл Оливер.