Тренерот на Аталанта е бесен поради начинот на кој се интерпретираат пеналите во корист на Јувентус, а најнова жртва на таквите судиски одлуки беше неговиот тим.
Аталанта го надигра Јувентус во саботата и тоа на гостински терен. На два пати водеше, но секој пат главниот судија му даваше пенал на домаќинот и Кристијано Роналдо израмнуваше. Двата пенала беа поради игра со рака: еден кога топката дури бегаше од шестнаесетникот, а другиот при блок. Ниту луѓето од ВАР собата не се осмелија да ја променат одлуката.
„Првиот пенал е јасен. Правилата во Италија се такви и за мене тие се ерес. Сега ни се случи нам и тоа е тоа. Дали и во другите првенства вака се судат? Не. Што да направиме, да им ги ампутираме рацете на играчите? На малите деца им се врзуваат рацете зад грбот за да научат да дриблаат... Она што треба да се промени е интерпретацијата на правилата“, смета Џан Пјеро Гасперини.
ФИФА лани донесе одлука за промена на интерпретацијата на играта со рака при судењето на пенали напоменувајќи дека ако играњето со рака не е намерно не треба да се суди доколку раката е во природна положба. Во Италија таквата интерпретација сезонава за едни се применува, но за други не.
