Легендата на Милан Џенаро Гатузо официјално е новиот тренер на Наполи, потврди клубот преку социјалните мрежи.
Гатузо доаѓа на клупата на неаполитанците на местото на Карло Анчелоти кој по победата против Генк со 4:0 и пласман во осминафиналето на Лигата на шампиони доби отказ, а причината за тоа се лошите резултати во Серија А каде Наполи не се конкуренти за титулата прваци во споредба со Интер и Јувентус.
Поради тоа, претседателот на Наполи Аурелио де Лаурентис одлучи да му врачи отказ на Анчелоти и на негово место на клупата го доведе Гатузо од кого очекува со својата жестока работа да ги разбуди играчите на Наполи и да ги врати во борба за титулата.
Гатузо со голем успех го водеше ослабнатиот Милан минатата сезона и до последното коло беше во борба за пласман во ЛШ, но со оглед на тоа дека тогашниот состав на тимот не беше доволно добар, челниците на клубот му се заблагодарија на Гатузо за ангажманот и го донесоа Марко Џампаоло од Сампдорија.
Гатузо (41) доаѓа на позицијата на својот поранешен ментор - Анчелоти му беше тренер кога играше во Милан.
Ова значи дека Гатузо ќе му биде тренер на нашиот репрезентативец, младиот Елиф Елмас, a според италијански La Gazzetta dello Sport, Елмас ќе добива значително повеќе шанси да се покаже под негово водство.
Наполи сега се наоѓа на седмата позиција во Серија А со 21 освоен бод, дури 17 помалку од Интер кој е на прво место.