Фудбал
ЛИГА НА ШАМПИОНИ 2019/20

Гатузо призна: Порано го шпионирав Сетјен

24. февруари 2020 - 13:50 | Ф.З.

Тренерот на Наполи е пред голем предизвик бидејќи утревечер во Неапол доаѓа моќната Барселона на чело со тренерот Кике Сетјен кого призна дека порано го шпионирал бидејќи му се допаѓала неговата тактика.

Џенаро Гатузо веројатно ќе го има најтешкиот натпревар во неговата кариера. Утре од 21 часот неговиот Наполи ја пречекува Барселона, еден од фаворитите за освојување на Лигата на шампиони.

„Во осминафиналето сме благодарение на Анчелоти, поздрав до него. Доколку утре не одиграме на високо ниво, ќе биде лошо. Откако Сетјен дојде во Барса тие многу побрзо ја одземаат топката, за само неколку секунди. Сакам да видам еден разигран Наполи, но противникот не е само Меси. Сакам да играме без страв. И претходно на „Сан Паоло“ сме пружале натчовечки партии“, рече Гатузо.

Тој дојде на чело на Наполи откако Карло Анчелоти ја мина фазата по групи како второпласиран.

Наполи и Барсе вечно ги спојува Диего Марадона кој играше и за двата тима. Затоа Гатузо доби тешко прашање, да каже кој е подобар помеѓу Марадона и Лео Меси.

„Диего е фудбалски Бог, но гледам дека и Меси ги прави истите работи како и тој. За жал Марадона го имам гледано само на снимки...“

Кога во 2017 година Гатузо дојде во Милан прво како тренер на младинскиот тим, Кике Сетјен го предводеше Лас Палмас. Неговите натпревари биле инспирација за Гатузо, призна самиот тој.

„Сетјен го шпионирав додека го водеше Лас Палмас. Многу ми се допаѓа неговиот начин на игра, како сите тимови кои ги води едноставно си играат со топката. Дури и во одбраната играат убаво за око. Тој полека ја враќа Барса како од пред некоја година. Тешко е да им се игра висок пресинг бидејќи одлично проигруваат и со голманот“, заврши Џенаро.

Коментирај