Општина Центар остро ги демантира наводите и шпекулациите дека санацијата на потпорниот ѕид на Клинички центар и улица „Белградска“ се во надлежност на општината. За тоа постојат законски акти и одлуки. Со одлука на Совет и Договорот склучен меѓу Град Скопје и Општина Центар на 05.08.2019 година, градските власти ја преземаат обврската за проектирање, изградба, користење, заштита и одржување на следниве улици на подрачејто на Општина Центар: „Белградска“, „Востаничка“, „Св. Кирил и Методиј“, „Димитрие Чуповски“, „Лазар Личеновски“, „Македонија“, „Митрополит Теодосиј Гологанов“, „Кеј Димитар Влахов“, „Пролет“, „Васил Ѓоргов“ и „Самоилова“.
Во договорот децидно стои: „Општина Центар се обврзува да не презема активности кои би ги попречиле или нарушиле проектирањето, изградбата, користењето, заштитата и одржувањето на наведените сообраќајници во Општината.
„Овој проблем се провлекува со години и постојано одговорот е ист, безбедноста и функционалноста на 'Белградска' не е наша надлежност. ЦУК и пред две години алармираше за состојбата со потпорниот ѕид кај Универзитетската клиника за детски болести и безбедноста на улицата 'Белградска'. На нивна иницијатива, Министерството за здравство посочи дека за санацијата е потребна координирана активност на јавните претпријатија на Град Скопје. И тогаш, Општина Центар, на 30.12.2022, децидно одговори дека безбедноста и одржувањето на 'Белградска' согласно Договорот од 05.08.2019, е обврска на Град Скопје. Да беше до нас, проблемот одамна ќе се решеше“, дециден е градоначалникот Горан Герасимовски.
Согласно договорот за меѓуопштинска соработка меѓу Градот и Општината, сите обврски за одржување на функционалноста на улица „Белградска“, што подразбира и градежни активности ако е потребно, е одговорност и обврска на Град Скопје, а Општина Центар не смее да презема активности во тој домен, се додава во соопштението на Општината.
ЦУК извести дека добиле пријава дека дел од ѕидот е урнат, но прашање на ден, можеби и час, кога ќе се сруши преостанатиот дел од ѕидот, каде што се паркираат и возила, а се движат и лица што влегуваат во болницата, изјави директорот на Центарот за управување со кризи, Стојанче Ангелов.
