Германскиот производител на роботи Neura објави видео на кое е прикажан хуманоидниот робот на компанијата наречен 4NE-1.
Хуманоиден робот може да извршува различни секојдневни задачи, од составување работи, преместување пакети, сечење зеленчук до пеглање маици. Сепак, под кои услови роботот може да ги извршува овие и други работи допрва треба да се објави.
Во секој случај, роботот претставува надеж за иднината на хуманоидните роботи и буди љубопитност за проектите на Neura.
На веб-страницата на компанијата се наведува дека хуманоидниот робот 4NE-1 е способен да извршува различни дневни и индустриски задачи. Треба да се напомене дека Neura има пристап до услугите, моделите и компјутерските платформи на Nvidia, кои ги користеше за развој, обука и производство на следната генерација на хуманоидна роботика.
Во видео објавено на YouTube се споменуваат и заслугите на Nvidia во остварувањето на сонот, а тоа е хуманоидниот робот да стане реалност и тоа многу брзо.
Роботот е висок 1,8 метри, што е просечна висина на човекот. Тежи 80 килограми и лесно може да носи товар тежок 15 килограми. 4NE-1 функционира на платформата Neuraverse и може да се движи со брзина до 3 км/час.
Еден од многуте X-фактори на хуманоидниот робот е тоа што неговите раце можат да се менуваат во зависност од потребите и целта.
Од компанијата велат дека роботот може да преземе различни задачи од луѓето дома и на работното место. Целта е хуманоидните роботи да бидат што подобро прифатени и луѓето да се фокусираат на „добрите работи во животот и да го користат своето време за креативни или забавни активности“.
Во видеото роботот 4NE-1 извршува различни секојдневни активности, а од компанијата велат дека може да се контролира и од далечина. Покрај тоа, тој има кожа опремена со сензори, како и напредни способности за учење за да стане подобар во својата работа.
Neura е една од бројните компании кои прават напори да развијат хуманоидни роботи кои ќе бидат широко прифатени. Компанијата Tesla има и програма во која развива хуманоиден робот наречен Optimus. Според основачот и извршен директор на Tesla Илон Маск, овој робот би можел да се најде на пазарот веќе следната година.
