Како дел од напорите за намалување на аерозагадувањето, сè повеќе европски градови наметнуваат ограничувања или забрани за дизел возила. Тоа ги става во неповолна положба оние кои продаваат половни автомобили, стои во анализата на Deutsche Welle.
„До неодамна, продажбата на дизел возила одеше одлично, а сега не можам да се ослободам од нив заради тие забрани. Еве, дизел Passat, еуро 6, речиси нов автомобил, не можам да го продадам ниту за 7.000 евра“, вели Акајган Хасан, сопственик на продавница за половни автомобили во Германија.
Според германското здружение на трговци со автомобили, дизел возило старо три години, со поминати 45.000 километри, губи половина од својата вредност.
Во Германија моментално има околу 350.000 половни автомобили, во вредност од пет милијарди еврa.
„Сите ми велат дека на Балканот можам да продадам поволен автомобил кој има поминато 300.000 километри“, вели еден продавач на половни автомобили.
Во 2018 година, 226.000 возила беа извезени од Германија на пазарите во Источна и Југоисточна Европа. Тоа е двојно повеќе отколку во 2013 година кога беа извезени 142.000 автомобили.
Германците сè помалку купуваат дизел заради забраната, односно ограничувањата во т.н. еколошки зони, кои се воведени во педесетина германски градови во последните години.
На „дизелашите“ им е забрането влегување во центарот на Штутгарт и Хамбург, а според најавите, забраните ќе бидат уште поригорозни во иднина.
Исти мерки се преземаат и во Милано и Лондон, нагласува Deutsche Welle.
