Германија изрази сомнеж во квалитетот и безбедноста на руската вакцина против коронавирусот и посочи дека лек, односно вакцина, може да се регистрира во Европската Унија само откако ќе бидат спроведени сите клинички испитувања.
„Безбедноста на пациентите е најголем приоритет. Нема податоци за квалитетот, ефикасноста и безбедноста на руската вакцина“, изјави портпаролката на Министерството за здравство.
Рускиот претседател Владимир Путин соопшти дека Русија е првата земја што регистрирала вакцина против COVID-19, по помалку од два месеци тестирања врз луѓе.
Германскиот министер за здравство Јенс Спан предупреди дека контроверзната руска вакцина може да биде опасна ако почне да се дистрибуира без да биде детално тестирана и дека може да го „убие“ прифаќањето на други вакцини ако се покаже како небезбедна или неефикасна.
„Може да биде опасно ако се почне прерано со вакцинирање на милиони, па и милијарди луѓе, бидејќи тоа може да го убие прифаќањето на вакцинацијата воопшто, ако се покаже како неефикасна. Многу сум скептичен за она што се случува во Русија“, рече Спан за радиостаницата Deutschlandfunk.