Националниот форум за готовина, основан од Бундесбанката како централна банка на Германија, предложи плаќањата во готовина да се заокружат на најблиските 5евроценти, со што монетите од 1 и 2 цента ќе станат минато.
Истражувањето на Европската комисија покажа дека 53% од Германците би поддржале укинување на монетите во горенаведените апоени. Прекинувањето би значело дека за производ, на пример, по цена од 4,99 евра, би платиле 5 евра, а за производ од 1,02 евра би платиле 1 евро.
Впечаток е дека монетите во апоени од 1 и 2 цента играат споредна улога во плаќањата за потрошувачите. Централните банки тврдат дека монетите наскоро ќе исчезнат од готовинските плаќања, што значи дека повеќето од нив ќе завршат во касички или ќе бидат изгубени.
„Генерално, економските и еколошките трошоци за производство, пакување и транспорт на монети од 1 и 2 цента се високи во споредба со нивната номинална вредност“, рече членот на управниот одбор на Бундесбанк, Буркхард Балц.
Укинувањето на овие монети треба да ги направи плаќањата во готовина попривлечни, а самите готовински плаќања поодржливи и поефикасни. Ова е причината зошто Националниот форум за готовина, кој се состои од претставници на трговијата на мало, банкарски здруженија, компании за транспорт на готовина и застапници на потрошувачи, побара од Федералното министерство за финансии да се заложи и да промовира законска обврска за заокружување на цените.
Доротеа Мон, експертка за финансиски пазар во Сојузната асоцијација на организации на потрошувачи во Германија, истакна дека готовината сè уште е средство број еден за плаќање за многу потрошувачи. Но, како што истакна таа, многу од нив не сакаат да имаат ситни парички.
„Пребарувањето на последниот цент во вашиот паричник на каса во супермаркет не е нешто во што многу луѓе уживаат. Затоа е добро што Националниот форум за готовина е посветен на решенија кои дополнително ќе го зголемат прифаќањето на готовина“, рече Мон.
Но, од трговското здружение HDE се неодлучни по ова прашање, посочувајќи дека тоа би имало и позитивни и негативни последици. Некои европски земји, вклучително и Финска, долго време применуваат заокружување на цените, што значи дека не пуштаат во оптек нови монети од 1 и 2 цент1. Слични правила постојат во Холандија, Словачка, Ирска, Италија, Белгија и Естонија. Сепак, тоа не значи дека монетите во гореспоменатите апоени се целосно укинати, бидејќи таква одлука може да се донесе само на ниво на Европската Унија, пишува tagesschau.
