Германските власти дадоа зелено светло за почеток на изградбата на првиот терминал за течен природен гас (LNG), соопшти енергетската компанија Uniper.
„Дозволата за изградбата што ќе започне пред предвиденото беше издадена многу брзо, што ја покажува важноста на терминалот за LNG во Вилхелмсхавен за безбедно снабдување со гас на земјата (Германија)“, рече извршниот директор на Унипер, Клаус-Дитер Маубах во изјавата во понеделникот.
„(Таа брзина) не може да се земе здраво за готово и пред сè покажува што може да се направи кога општеството, индустријата и политиката ќе се договорат“, додаде Маубах.
Според компанијата, во понеделникот официјално започна изградбата на пловечкиот терминал за LNG во Вилхелмсхавен на брегот на Северното Море.
Терминалот се очекува да обработува до 7,5 милијарди кубни метри природен гас годишно, што значи дека ќе задоволи околу 8,5 отсто од сегашната побарувачка на гас во Германија и треба да започне со работа на крајот на оваа година или почетокот на следната година.
Министерот за животна средина, енергетика, градежништво и заштита на климата на Долна Саксонија, Олаф Лиес, рече дека се многу задоволни што работите тргнале од мртва точка.
„Ни треба замена за рускиот гас што е можно поскоро, а ние на север сме подготвени да го земеме на грб“, додаде Лис.