Германската државна развојна банка KfW најави поголема поддршка за зелено реновирање на зградите и ценовно прифатливи станови оваа година, истакнувајќи ги готовинските инјекции за технологии клучни за енергетската транзиција.
Над 10 милијарди евра се резервирани во овогодинешниот буџет за реновирање на згради и за домување, приближно половина од потрошеното во 2023 година, соопшти вчера банката.
„Согласно наредбата на владата, ние им помагаме на луѓето во Германија во постепена транзиција кон климатски прифатливо домување“, рече претседателот на банката Штефан Винтелс на почетокот на прес-конференцијата.
Kfw ќе ги искористи буџетските пари што ѝ се ставени на располагање за да создаде стимулации за создавање прифатливи станови, додаде Винтелс.
Поддршка ќе се обезбеди и за помалите компании, посочуваат од банката, најавувајќи поголеми суми за „централни теми“ како лизинг, развој и промоција на клучни технологии за енергетската транзиција.
Минатата година банката го намали обемот на нови деловни активности за една третина, на 111,3 милијарди евра. Домашните стимулации беа речиси преполовени, на 77,1 милијарди евра.
Падот е одраз на значително намалената поддршка за енергетскиот сектор и за ефикасни згради во споредба со 2022 година, кога владата се обиде да го олесни товарот од високите цени на енергијата врз компаниите и граѓаните.
