Украинскиот претседател Володимир Зеленски реагираше претпазливо на извештаите дека германскиот канцелар Олаф Шолц се согласил да ѝ достави на Украина борбени тенкови Leopard 2.
„Многу труд, зборови и ветувања“, рече тој во своето секојдневно видео-обраќање доцна синоќа.
„Но, важно е да се види реалноста“, додаде украинскиот претседател. „Не се работи за пет, ни десет, ни петнаесет тенкови. Потребата е поголема. Секој ден правиме сè што е потребно за да го пополниме недостатокот. И благодарен сум на сите што нè поддржуваат во тоа.“
Со месеци Зеленски апелираше до Берлин да му понуди на Киев тешко оружје за да возврати на руските сили.
Дискусиите за испорака на тенкови сега мора „да завршат со одлуки за вистинско зајакнување на нашата одбрана од терористите“, рече украинскиот лидер.
По неколкунеделниот зголемен притисок врз Берлин, извори во вторникот рекоа дека германската влада одлучила да ѝ испорача на Украина тенкови Leopard 2.