Поранешен болничар од Германија призна дека убил 100 пациенти за време на неговите ангажмани во две болници. Денеска е првиот ден од неговото судењето, а се работи за најголемиот случај на сериски убиства во оваа земја по Втората светска војна.
Нилс Хогел (41), кој веќе отслужува доживотна казна затвор поради убиства на неговите пациенти, денеска беше изнесен на суд поради дополнително откриени убиства кои тој наводно ги извршил во периодот помеѓу 1999 и 2005 година.
Тој е обвинет за намерно предизвикани предозирања на неговите пациенти, за потоа да може да ги врати во живот во последен момент. Хогел помина скоро една деценија зад решетки поради обвиненијата за убиени пациенти во две германски болници. Обвинителството вели дека најмалку 36 пациенти биле убиени во болницата во Олденбург и околу 64 пациенти во болницата близу Делменхорст, две од местата каде Хогел работеше во периодот од 1999 до 2005 година.
„Да. Признавам дека го направив она за кое што сум обвинет. Тоа навистина се случи“, изјави тој пред полната судница кога беше запрашан дали е виновен за убиствата.
Повеќе од 130 тела на пациентите кои умреа во смените на Хогел беа ставени на маса за обдукција, со цел да се утврди причината за смртта на секој еден од нив.
Еден од многуте сведоци во судењето, Кристијан Марбах, рече дека е скандалозно што на Хогел му било дозволено да убива низ болниците во Германија толку долго време без да се вмеша власта или пак раководството на некоја од болниците.
„Имаа сѐ што им беше потребно за да го запрат. Не е потребно да сте Шерлок Холмс за да знаете дека е виновен“, изјави Марбах.
