Губење на авторитетот и крај на ерата на Ангела Меркел, се само некои од насловите во германските медиуми, еден ден откако конзервативниот блок за претседател на клубот одбра друга личност наместо Волкер Каудер, кој со години и беше десна рака на германската канцеларка.
Во тајно гласање на членовите на Христијанско-демократската унија (CDI) на Ангела Меркел и баварската Христијанско-социјална унија (CSU), Волкер Каудер, десната рака на канцеларката, доживеа пораз од страна на неговиот заменик Ралф Бринкхаус.
„На ерата на Ангела Меркел и доаѓа крајот“, објави после гласањето најпопуларниот германски весник „Bild“.
„Bild“ ова гласање го карактеризираше како „најболниот ден“ за Меркел, па се доведува во прашање и нејзиното останување на позицијата канцеларка.
„Ова не е ништо друго освен знак за нова епоха: Меркел ја пропушти приликата да се откаже од својата поддршка кон Каудер. Стабилна транзиција со неа повеќе не е возможна“, пишува во текст на „Die Welt“.
Партијата CDU се обиде да го ублажи тој настан, а самиот Бринкаус рече дека „тоа не е голема драма“ и дека тоа ќе ја „зајакне владата и конзервативниот блок“.
Бринкхаус, инаку, во CDU се приклучи во 1998 година, а него го сметаат за експерт за финансии, но не и за политички прашања, пишуваат германските медиуми.
Неодамна тој два пати влегуваше во конфликт со канцеларката, прв пат во 2017 година, кога тој го испитуваше нејзиниот план за ограничување на даночните олеснувања за претприемачите, а потоа и во 2018 година кога тој напиша критика за предлогот на францускиот претседател Емануел Макрон поврзан со иднината на ЕУ, пишува „Die Welt“.