Коронавирусот, кој се рашири низ светот пред пет години и го блокираше животот во многу земји, потекнува од лабораторија во Вухан, Кина, според германската разузнавачка служба (BND), како што објавија денеска германските и швајцарските медиуми.
„BND поседува јасни докази дека вирусот SARS-CoV-2 потекнува од Институтот за вирологија во Вухан“, објавија медиумите.
Според овие наводи, германската разузнавачка служба уште во 2020 година имала докази дека коронавирусот се проширил низ градот, а подоцна и низ целиот свет поради „лабораториска несреќа“.
Овој заклучок е донесен по анализата на податоците кои стигнале до германските власти како дел од разузнавачката операција со кодно име Saaremaa.
Резултатите од истрагата на BND ги знаела и тогашната германска канцеларка Ангела Меркел, која според пишувањата на медиумите, меѓу кои и неделникот Die Zeit, го спречила објавувањето на овие податоци. Нејзиниот наследник Олаф Шолц го направи истото.
Портпаролката на германската влада денеска одби да ги коментира медиумските написи, велејќи дека владата јавно не ја коментира работата на тајните служби.
Канцеларијата на германската канцеларка ги дала податоците што ги поседува BND на експертиза на група научници, пишува швајцарскиот Neue Zürcher Zeitung.
Иако официјалните резултати од вештачењето не се објавени, научниците наводно сè уште се поделени околу теоријата за потеклото на вирусот.
Експертите велат дека недостигаат „конечни докази“ дека вирусот потекнува од лабораторија. Добар дел од нив веруваат дека вирусот се пренесувал од животни на луѓе на фарми.
„Кинеските научници имаат механизми да обезбедат докази дека вирусот навистина потекнува од природно потекло, но досега немаат објавено ниту една студија што би го докажала тоа“, рече еден од најпознатите германски виролози, Кристијан Дростен, коментирајќи ги најновите медиумски извештаи.
